Nang malsawmna ni ang che

Khawvelin a ngaihsan leh a theihnghilh mai loh tur Mother Teresa in Kolkata kawtthler a miretheite tana malsawmna ni tura Pathian kohna a chhan lai khan Rs.5 chauh a nei. Harsatna pawh a tawk hnem, mahse a hna a tan meuh chuan kil tin atangin tanpuina a lo thleng anih kha! St. Peter´s Basillica kum za nga tlin lawmna denchhena exhibition hmuhnawm tak an neihah Mother Teresa slipper leh miretheite tana thawk tura hotute phalna a dilna lehkha an pho chhuak a. A entu mipuite rilru a hnehin tlawhtu an tam nangiang mai. Mit ngei a ka va hmu ve chu vannei ka inti hle. Chutiang taka ngaihlut a nihna hi mite tana malsawmna ni tur a a inpek ral thak vang a ni. Mite tana malsawmna nih duhtute Pathianin a enkawl tlat a, finna leh dawhtheihna a pe thin. Malsawmna ni tur a Pathianin min kohna kan chhan hian hlimna dik tak min thlen thin.
Nu leh pa te u, hei leia hmuh theih Pathian in ni asin! In rochan leh mawhphurna hi a va hlu em! Nitin in thutiam tithar a in fate malsawm hi in tihtur a ni. Malsawmna in kutah Pathianin a dah avangin in fate tan (in fa sualte pawh) an lu chungah kut nghatin tawngtai teh u. In fate thiltih - an zirna, hna leh zinna te hi mal han sawm sak mah teh u, Pathian thatzia in hmu ngei ngei ang. Kawng i kal lai te, motor i chuan lai te leh i hnathawhnaah te rilru tawngtaina neiin, i mi hmuhte leh i thawhpuite kha mal han sawm teh. I hriat zàwng an nih loh pawhin an tan thil tha duh la, Lal Isua malsawmna dil sak ang che. Mak tak a ni, a hlawkna i tèl nghal ang. ´A thlawnin in dawng a, a thlawnin pe ve rawh u´ (Mt. 10:8) tih a ni si a. Phal takin malsawmna chu sem chhuak chur chur mai teh le.
Zirlai duh tak, thuawih leh taima taka i zir/ thawh kha nakin zela mite tana malsawmna i nihna tur a ni. Beidawnna leh tahna thlentu atan tumahin khawvel eng an hmuh tir si lo che a. I fail palh a nih pawhin beidawng mai suh, hun tha i la nei asin! Malsawmna dawng turin i tihtur i hlen ve a ngai a, i thatchhiatna rah sengtu tur pawh nang leh i chhungte an ni. Kan ram leh hnam hian mithiam a mamawh zel dawn, Krismas hi rilru siam nan hmang ngei ang che. Mimal leh Kohhran anga i tawngtaina kha a thlawn dawn lo. Chhanna i hmuh mai loh avangin beidawng lo la, Lalpa aw nghak ang che. Kan dil apiang hmu ta nghal zel ila, mite tana biak hrehawm khawpin kan chapo thei. Chuvang alawm mitin mai hian kraws kan neih theuh. Kan duhna aia Lalpa remruatna kan dah lal hunah mite tana malsawmna kan ni ang. Chu nun tak chu Zoram hian a va mamawh em! Midangte tana malsawmna nih intiam thah ram hruaitu kan thlang ta! Pathian leh mipui an dah lal a tul hle ang. Lal ni lova rawngbawltu an nihna hria a, an thutiamte atak a chantir chu mite tana malsawmna an nihna tur a ni. Ram hmasawn nan sorkar tha ringawt a tawk lo. Mitinin duhamna, eirukna leh chapona sual kan bansan a, rilru dik kan put a hun tak meuh mai.
Lusun khawhar te tana malsawmna kan nih a va tul em! Khawhar chhung ten thlarau damna changa Pathian leh Kohhran an belh leh theih nana tawngtai sak a, dawhthei taka ngaithla a kan tanpui hi an tan malsawmna kan nihna hlu tak a ni, theihnghilh mai lovang u. Lusunte pawh a hma ang an ni thei tawh lo, lusun dangte tan hnemtu an ni fo tawh ang. Ringtu thlirna atang chuan Pathian tel lovin mite tan malsawmna kan ni thei lo. Mahni theihna a làwn sang viau Lalpa thununna in a pawhthlak kan velah kan hmu teuh. Nang leh keipawh chutianga thunun fo kan ni lo maw? Chhungkaw tin mai hi kan chapo lohna tawk tur kraws pek theuh kan ni. Lalpa thununna a ni tih hrethiam chuan an pawm thlap a, malsawmnaah an chantir thin. Lalpa thununna ngaihlutu chuan a tluk chang pawhin Pathian a au tlat a, kaihthawhin a awm leh thin. Chu chu ringtu nun a ni. Kan chakloh avang taka tùk tin Krista thlang thar tur kan ni.
Kristian nun chu kraws kawng a ni. Harsatna chuan puitlingah min siam a, kan tuar tam pauh leh mite tana malsawmna kan nihdan a thuk zel thin. Thlarau leh inpekna tel lova rawngbawltu chu kristian lem, hmantlak loh leh midangte tan tlúkna a ni. Kan ram leh Kohhranah hetiang mi hruaitu kan ngah lutuk hi kan tawih ralna chhan pakhat a ni. Krista khawngaihna an hnawl avangin mite tana malsawmna an ngai lo. Mahse Pathianin a koh tawh chu sualah a hlim thei lo, a Pathian nena hlim lo chu tudang nen mah a hlim thei hek lo. Hlemhletna kan chawilenna leh Kristianna káwr a kan hmanna hian kan tu leh fate ah nghawng a nei zel tih hriat a hun hle! Pathianin min dahna hmun theuh a rinawm takin i thawk ang u. Hun lo kal zel tur atan rinawmna leh dikna aia hlu a awm thei lo. Krismas hian kan zui Lal Isua retheihna tawmpuitu leh thinlung zawng zawnga a rawngbawltu ah min siam theuh rawh se. - Denis lalfela